Yağış - Lalə Məmmədova

Göyün xətrinə kim dəyib?

Kəsilmir, narın ağlayır

Dumanla üzünü örtüb

Kimsə duymasın, ağlayır

Narın yağış səsin kəsə

Yolçu qərib səsləyən kim?

Gecə pəncərə önündə

Göy qurşağı gözləyən kim?

Xatirələr pərən — pərən

Ümidlərim islanacaq

Yağış sevgi duasıtək

Ötənləri qaytaracaq

Bulud buluda sevgili

Şimşəyin odu sönübdür

O qızın gözü göy üzü

Narın yağışa dönübdür

Ya bax günəşli şəhərə

Bu yağış nə gətirəcək?

Xatirələr yuyulduqca

Kirpiklərim şeh çəkəcək